Merkelapp-arkiv: kauni

Haustferiespøt

Haustferien kom og både vottar og anna ulltøy vart pakka. Det regna godt då me køyrde til Herand i Jondal kommune. Og regnet haldt fram nesten heile vegen til Tostølen. Me hadde lånt hytte gjennom inatur.no, ei lita hytte på 800 moh. Turen er skildra hos Jondal Turistinformasjon og kart og gps-fil er å finna på lommekjent.no.

Etter mange timer til fots kom me endeleg fram! Tostøl ved Tostølvatnet. Etter ein dopause og nokre kjeks måtte eg retunera eit par km for å henta sekken min. Minstemann (3 år) var så sliten og orka ikkje gå lenger i regnet så han måtte på ryggen. Han har vorte for stor til å sitja på magen synte deg seg, så sekken måtte venta. Då eg kom attende til Tostøl for andre gong den kvelden var hytta varm og middagen ferdig. Heilt fantastisk!

Tostøl i Herand.

Hytta låg heilt perfekt til for fisking og rykta tilsa at det skulle vera godt med fisk i vatnet. Heldigvis hadde me ikkje satsa på at sjølvfanga fisk skulle vera ein del av middagen.

Klar for fisketur

Yngstemann hadde ikkje heilt tolmodet til å fiska. Og eg forstår han så godt. Det er KJEDELEG å fiska. Kjempekjedeleg. Derimot klarte han å fanga ei mamma.

Eg har fanga ein mamma!

Eg prøvde å sløva mest mogleg  inne. Kvalitetssløving med spøt. Eg hadde med Silkegenser frå Strikk meir til nøstebarn til Storebror. Fin ferie og nesten ferdig med bolen den tida med var på hytta.

Haustferiespøtet

Det synte seg at det var noko feil med lengda på turen. Det står oppgjeve at han er 4,8 km. Men både GPSen og runkeeper påstår at turen er 5.5 km lang. Storebror såg me knapt nok, kun ved start matpause og ved bilen att. Treåringen gjekk heile vegen sjølv.

På veg frå Tostøl til Våhaug kor bilen sto parkert

Før me reiste, så hadde eg spøta vottar og halsar til dei. Fiskarhalsar frå Strikk meir til nøstebarn. Eg tenkte dei ville vera perfekt å ha under hetta dersom det regna.

Fiskarhals2a
Fiskarhals1a
Fiskarhals 1 og 2

 

Fiskarhals

  • Fiskarhals, storleik vaksen: 54 g Kauni effektgarn spøta på pinnar 4,0 mm
  • Fiskarhals, storleik born: 51 g Nøstebarn 3-tråds merinoull spøta på pinnar 4,0 mm

Oppskrifta på Fiskarhals er henta frå Strikk meir til nøstebarn av Kathrine Gregersen.

 

 

Steget over dørstokken = heftig vottespøt!

Dørstokkmila er lang her i heimen. For ikkje å snakka om at dørstokken i seg sjølv er ganske høg. Me har snakka om at me har lyst å gå meir i fjellet men det er vanskeleg å omsetja ord i handling. Så då Mannen på impuls reserverer ei hytte på Folgefonnshalvøya til haustferien, må eg til pers. Sidan eg faktisk er i løna arbeid så må kvart einaste ledige minutt av dagen nyttast. Til å spøta vottar. I fleirtal.

Eg spøta på bussen. Heime. På foreldremøter. Til og med då me åt føremiddagsmat på jobb, hadde eg med spøtet mitt. Eg vart ferdig og me hadde alle med vottar på fjellet. Dei klassiske vottane til Storebror og megsjølv er enkle og raske å spøta. Vottane til Maiblomen var det verre med. Det tok meg ein heil kveld før eg fann ut korleis eg kunne spøta patent på rundpinne (eller med fem pinnar som eg gjorde). Oppskrifta påstod eg skulle spøta fram og attende og sy saman etterpå. Eg gjorde eit forsøk og fekk det ikkje til. Iherdig googling gjorde at eg fekk hjelp. Og det var jo til og med enkelt 1. Eg gjekk ikkje så godt overeins med garn, pinnar og strikkefasthet. Ikkje denne denne gongen heller. Så eg måtte verkeleg triksa med kor mange maskar eg skulle leggja opp og kor mange omgongar eg skulle spøta for å få vottar som var passe store. Eg er veldig nøgd med at dei har eit langt brot som er lett å trekka oppå utekleda. Eg er ikkje fullt så nøgd med avsluttinga på vottane. Dei er felt i ein spiss. Eg forkorta han noko men ser at eg må rundfella vottane dersom eg skal spøta dei att seinare.

Vottar

Vottar

Vottefakta

  • Klassiske i storleik 8-10 år: 37 g Ask frå Hillesvåg Ullvarefabrikk. Spøta på pinnar nr 4,0 mm.
  • Klassiske i storleik 8-10 år: 29 g Kauni 8/2. Spøta på pinnar nr 4,0 mm.
  • Klassiske i medium dame: 34 gram Kauni 8/2. Spøta på pinnar nr 4,0 mm.
  • Bjalla i storleik 4 år: 53 gram Léttlopi frå Istex. Spøta på pinnar nr 3,5 og 4,5.

Dei klassiske vottane er ei gratisoppskrift. Ravelry og Free Vintage knitting.
Bjalla er henta frå den danske utgåva av boka Islandsk strikk av Oddný S. Jónsdóttir.


  1. eg tek sjølvkritikk for ikkje å ha teke vare på lenka som forklarte dette så fint 

Bilspøt

Turen til Svigers er ein god biltur der me krysse vasskiljet mellom Vest og Aust. På slike lange turar like eg å spøta men ikkje alt er eigna for bilen. For tida er eg med på eit hemmeleg samstrikk (knitalong/KAL) på Ravelry. Eit sjal frå designaren Stephen West men det krev for mykje telling til at eg kan gjera det i bilen.

Så i staden har eg starta på ein genser til Maiblomen. Rullegensaren frå Nøstebarn i Kauni 8/2

Ved avreise. Eg la opp og spøta to omgongar før me reiste slik at eg skulle sleppa det i bilen

20120726-120445.jpg

Akkurat framme hos Svigers etter ein lang tur

20120726-120514.jpg

Fresco Basket Whip Cowl

Eg har verdas beste Svigermor!

Til trass for at me bur på kvar si side av Langfjella, så hjelpe ho oss så godt ho kan. Sist var i samband med  dåpen til Maiblomen. Ho (og Svigerfar) kom over nokre dagar før dåpen og hjalp til med husvask og rydding og ikkje minst matlaginga til dåpen. No var det sodd (er jo gift inn i ei trønderslekt), så det kunne vore verre. Men eg er så takknemleg for at ho tek seg tid og kjem over og vitjar og hjelp oss med det som trengst. Tidlegare i år var ho hos oss i samband med fødselen til Maiblomen. Då tok ho seg av Storebror, henta han i barnehagen, laga mat til meg. Rydda og luka masse ugras i hagen vår. Det var ikkje så mykje me hadde fått gjort på vårparten ettersom eg var fullstendig ute av stand til noko som helst, då prioriterte eg heller å vagga på tur medan Mannen lufta hundane våre. Då Svigermor tok fatt på hagen så var det nok å gjera der. Resultatet var at me fekk gjort det me hadde planlagt, nemleg lagt på duk og bark slik at området ho rydda no skal vera til roser, liljer, peonar og andre staudar samt jordbær og bringebær.

I Maiblomen sin dåpsfest 22. oktober sa Svigermor at ho ynskja seg ein hals til å ha til den brune kåpa si. Kåpa manglar hette og ho ville ha ein fargerik hals som ho kunne ta over hovudet når det snør. Klart eg spøte ein hals til Svigermor – eg har trass alt verdas beste Svigermor. Ho fall fullstendig for Kauni sitt effektgarn då me (mest eg) vitja Therese Kvam si vevstove i sommar. Ein rask fargekonsultasjon med Svigerinna mi vert gjort og eg landa på fargen EU, altså raudguloransj. Eg fann gratismønsteret Fresco Basket Whip Cowl av Laura Patterson på Ravelry. Eg har spøta ein mønsterrapport meir enn det som står i oppskrifta for at halsen skal bli litt lenger. Eit enkelt blondemønster, kast og spøt saman to masker gjer at eg fint kan sjå seriar medan eg spøte halsen. Så i løpet av ei veke har eg sett sesong 3 og 4 av Mad Men samt nokre episodar av Stargate SG-1 sesong 6.

Og vill og gal som eg er, så har eg faktisk blitt med på Pinnekroken si utfordring «Noe som varmer«.

Modell: Baff

 

Nok eit sjal

Tidlegare i sommar var eg hos To Damer på Askøy og kjøpte garn. I utgangspunktet kjøpte eg Kauni effektgarn i raudt og oransje for å spøta noko til Storebror og tok i tillegg med meg blågrøn Kauni fordi fargen var så fin. Garnet vart liggjande medan eg gjorde ferdig andre prosjekt, men så fann eg ut at eg likte så godt å strikka sjal at eg godt kunne gjenta suksessen. Eg har tidlegare skrive at eg er ein frysepinn, så eit stort trekantsjal til innebruk kunne nok vera ein god idé.

Eit søk på Ravelry etter sjal som ikkje var strikka i den tynnaste ulla, gav meg sjalet MacKay av Elizabeth McCarten. Så då var det bare å setja igong. Planen var at dette skulle vera eit langtidsprosjekt kor eg skulle spøta andre ting innimellom. Men ein ferietur til Oldemor og påfølgjande camping på veg heimover gjorde susen og brått var sjalet ferdig.

Eg er supernøgd med sjatteringane i Kaunigarnet. Og det blir nok fleire sjal etterkvart, eg var vistnok ei sjaldame likevel…