Kategoriarkiv: Til born

Endeleg: Ullbukser

Frå 2012 då yngstemann skulle starta i barnehagen. Var tidleg ute med å planleggja barnehagespøtet. Derimot var eg ikkje fullt så tidleg ute med å få skrive ferdig om dei.

Ullbuksespøting når det er sol og varmt, heile 25 grader, kan kanskje sjå litt unødvendig ut. Men det var ein plan bak det heile. Nemleg at når det blir surt og kaldt så er allereie ullbuksene klare. Men i sandkassen og det er varmt og fint så var det langt fram til haust og surt vêr.

20120831-092447.jpg

Desse buksene er spøta i Viking Nordlys, eit superwashgarn med 20% polyamid. Eigentleg eit sokkagarn men eg håpe det skal gje buksene litt ekstra slitestyrke. Og så er det så fine fargar. Eg blir så glad av fargerike ullkle 🙂

Etterord: Eg hatar superwash!

Endeleg: Harry the Sailor Boy – aka Matrostrøye

Frå 2012 då yngstemann var eitt år gamal.

Boka «Vintage Baby Knits» av Kristen Rengren har mange oppskrifter til små gutar og jenter. Otto’en var henta frå denne boka og no har eg spøta Harry’en til Maiblomen.  Harry Sailor Sweater  i matrosstil går tilbake til 1946 då  militærstilen til smågutar var populær. Matrostrøyer ser jo ikkje ut til å gå av moten og Maiblomen var ein staseleg gut både då han feira eittårsdagen sin og på syttande mai.

Mandarin Petit har omlag same lengd per 50m som det oppgjevne garnet i oppskrifta (Rowan Yarns 4-ply Cotton) så med pinnar nr 2,5 rekna eg med at strikkefastheta ville stemma. Men det gjorde det ikkje. Eg var så langt frå den oppgjevne at eg enda med å måtte rekna om for å få ei passeleg trøye til Maiblomen. Og fyrst etter at eg var ferdig så fann eg ut at Pinnsvin Design sel garnet eg eigentleg skulle nytta i oppskrifta. Jaja, men trøya vart no uansett kjempefin.

HarryTheSailor3

 

HarryTheSailor2

 

HarryTheSailor

Nissehue og Nysirkus

Det er snart jol. Og før jol kjem advent. Og med advent kjem opning av jolegata og tenning av jolegrana i Hølen. Nytt av året er at yngstemann skal opptre med Nysirkus i nissekostyme og med nissehue. Og då må mor trå til. Eg lagar ikkje nissekostyme. (Han var ganske så bestemt på at han ikkje skulle ha heimespøta kostyme. Kva i alle dagar har eg gjort gale dei siste seks åra?) Derimot har eg spøta lang nissehue til han.

Til trass for at eg har vorte ein stril i eksil, så er det relativt enkelt å få tak i skikkeleg ullgarn her på det (u)sentrale austlandet. På Strilalandet måtte eg reisa heilt til Byd’n (eller Bergen som andre vil kalla det) for å kjøpa garn frå Hillesvåg Ullvarefabrikk. Ein ekspedisjon. Her kan eg få kjøpt Hifa Ask i nabobygda. Ein liten sykkeltur unna.

Garn vart kjøpt inn. Nye pinnar. Eg veit aldri kor dei gamle pinnane er. Det må vera to millionar pinnar i limbo ein eller annan stad, dei er i alle fall ikkje her i huset. Og så var det berre å setja i gang.

Garn, pinnar og talet på masker på tilpassast den som skal ha hua. Eg kunne nok lagt opp færre maskar sidan 6-åringen ikkje har like stort hovud som meg. Heldigvis. Og ikkje minst hadde eg klart meg med eitt hespe dersom det var færre masker. Eller eg hadde droppa dusken.

  • Eg la opp 112 masker på pinnar nummer 3,0 mm og spøta vrangbord (to rette og to vrange) i fem centimeter
  • Auka 8 masker (spøt 7m, *auk 1m, spøt 14m*, gjenta ** 7 gonger, auk 1m, spøt 7m) til totalt 120 masker
  • Eg spøta 16 cm, inkludert vrangborda, før eg starta fellinga
  • Fell slik:
    • Finn ut kor lange hua skal vera og rekne ut kor mange fellingar du treng for å få passe lang hue
    • Plasser maskemarkørar i starten av omgangen og 3 stader til med like mange masker mellom. Her er det 30 masker mellom kvar
    • Spøt dei to fyrste maskene på omgangen saman og spøt til neste markør, flytt denne over på høgre pinne og spøt dei to neste maskene saman. Hald fram slik ut omgangen
    • Spøt 6 omgangar til
    • Gjenta dei to siste punkta til det er 12 masker att på pinnane
    • Dra tråden gjennom dei siste maskene og fest godt
  • Lag dusk og sy fast

Kor mange gonger eg felte:

{120} masker -{4x} fellingar ={12} masker
x={27} fellingar
Eg skulle spøta lang hue så eg måtte rekna litt på kor mange omgangar det skulle vera mellom kvar felling og eg enda opp med 6 omgangar mellom.

Totalt er hua 73 cm lang.

 

Nissehue

  • Hifa Ask, farge 6014 klar raud
  • 101 gram
  • Pinnar nr 3 og 3,5
  • Mi strikkefasthet: 22 masker på 10 cm på pinnar nummer 3,5 mm
  • Storleik: Vil vara i mange år

Oppskrift etter eige hovud inspirert av dei mange hueoppskriftene som finst

Eg kunne nok med føremon spøta hua på pinnar 2,5 mm og 3,0 mm i staden for. Då hadde ho vorte litt mindre luftig. Samstundes måtte eg hatt fleire omgangar mellom fellingane for å få like lang hue.

Rockefeller i Canada

Medan andre laga julekaker, vaska hus og sprang frå den eine avsluttinga til den andre, så var eg i Canada. Jobb kombinert med litt ferie. Den perfekte husmorferien med andre ord.

Eg deltok på konferansen Arctic Change 2014 i Ottawa, Canada. Her presenterte eg min del av forskingsprosjektet Polarisation.

IMG_1944

Eg drakk ikkje berre vin på konferansen. Eg spøta óg.  Maiblomen skal få Villsauene på Runde av Ann Myhre/Pinneguri og dette var perfekt reise- og konferansespøt. Lange flyreiser og fleire timar på konferanse og eg vart ferdig med bolen og det eine ermet. Trøya er spøta i Rauma finull

IMG_1673

I tillegg til å vitja gamle kjente medan eg var i Canada, så måtte eg sjekka ut dei lokale garnselgjarane. Og eg kom heim med nokre fantastiske skattar. Handfarga og handspunne garn samt maskemarkørar kjøpt på Wabi-Sabi. Hadde ikkje kofferten allereie vore full, så hadde eg kjøpt med ein rokk i reiseutgåve.

IMG_1667

Det er over to år sidan eg var med på ein mysteriespøt, mystery knitalong, på Ravelry. Sjal i Stephen West sitt lett attkjennande geometriske design. Det tok to år frå eg var ferdig med sjalet til eg tok meg tid til å festa trådane. Når sjalet no var med på husmorferie til Ottawa Valley, så fekk eg endeleg teke bilete av det.
IMG_1711

IMG_1699

IMG_1697

 

Rockefeller

  • Isager Strik Spinni, Brun 60
  • Isager Strik Spinni Tweed, Raud 28S
  • Pinnar nr 3

Rockefeller er designa av Stephen West, westknits.

Haustferiespøt

Haustferien kom og både vottar og anna ulltøy vart pakka. Det regna godt då me køyrde til Herand i Jondal kommune. Og regnet haldt fram nesten heile vegen til Tostølen. Me hadde lånt hytte gjennom inatur.no, ei lita hytte på 800 moh. Turen er skildra hos Jondal Turistinformasjon og kart og gps-fil er å finna på lommekjent.no.

Etter mange timer til fots kom me endeleg fram! Tostøl ved Tostølvatnet. Etter ein dopause og nokre kjeks måtte eg retunera eit par km for å henta sekken min. Minstemann (3 år) var så sliten og orka ikkje gå lenger i regnet så han måtte på ryggen. Han har vorte for stor til å sitja på magen synte deg seg, så sekken måtte venta. Då eg kom attende til Tostøl for andre gong den kvelden var hytta varm og middagen ferdig. Heilt fantastisk!

Tostøl i Herand.

Hytta låg heilt perfekt til for fisking og rykta tilsa at det skulle vera godt med fisk i vatnet. Heldigvis hadde me ikkje satsa på at sjølvfanga fisk skulle vera ein del av middagen.

Klar for fisketur

Yngstemann hadde ikkje heilt tolmodet til å fiska. Og eg forstår han så godt. Det er KJEDELEG å fiska. Kjempekjedeleg. Derimot klarte han å fanga ei mamma.

Eg har fanga ein mamma!

Eg prøvde å sløva mest mogleg  inne. Kvalitetssløving med spøt. Eg hadde med Silkegenser frå Strikk meir til nøstebarn til Storebror. Fin ferie og nesten ferdig med bolen den tida med var på hytta.

Haustferiespøtet

Det synte seg at det var noko feil med lengda på turen. Det står oppgjeve at han er 4,8 km. Men både GPSen og runkeeper påstår at turen er 5.5 km lang. Storebror såg me knapt nok, kun ved start matpause og ved bilen att. Treåringen gjekk heile vegen sjølv.

På veg frå Tostøl til Våhaug kor bilen sto parkert

Før me reiste, så hadde eg spøta vottar og halsar til dei. Fiskarhalsar frå Strikk meir til nøstebarn. Eg tenkte dei ville vera perfekt å ha under hetta dersom det regna.

Fiskarhals2a
Fiskarhals1a
Fiskarhals 1 og 2

 

Fiskarhals

  • Fiskarhals, storleik vaksen: 54 g Kauni effektgarn spøta på pinnar 4,0 mm
  • Fiskarhals, storleik born: 51 g Askeladen 3-tråds merinoull spøta på pinnar 4,0 mm

Oppskrifta på Fiskarhals er henta frå Strikk meir til nøstebarn av Kathrine Gregersen.

 

 

Steget over dørstokken = heftig vottespøt!

Dørstokkmila er lang her i heimen. For ikkje å snakka om at dørstokken i seg sjølv er ganske høg. Me har snakka om at me har lyst å gå meir i fjellet men det er vanskeleg å omsetja ord i handling. Så då Mannen på impuls reserverer ei hytte på Folgefonnshalvøya til haustferien, må eg til pers. Sidan eg faktisk er i løna arbeid så må kvart einaste ledige minutt av dagen nyttast. Til å spøta vottar. I fleirtal.

Eg spøta på bussen. Heime. På foreldremøter. Til og med då me åt føremiddagsmat på jobb, hadde eg med spøtet mitt. Eg vart ferdig og me hadde alle med vottar på fjellet. Dei klassiske vottane til Storebror og megsjølv er enkle og raske å spøta. Vottane til Maiblomen var det verre med. Det tok meg ein heil kveld før eg fann ut korleis eg kunne spøta patent på rundpinne (eller med fem pinnar som eg gjorde). Oppskrifta påstod eg skulle spøta fram og attende og sy saman etterpå. Eg gjorde eit forsøk og fekk det ikkje til. Iherdig googling gjorde at eg fekk hjelp. Og det var jo til og med enkelt 1. Eg gjekk ikkje så godt overeins med garn, pinnar og strikkefasthet. Ikkje denne denne gongen heller. Så eg måtte verkeleg triksa med kor mange maskar eg skulle leggja opp og kor mange omgongar eg skulle spøta for å få vottar som var passe store. Eg er veldig nøgd med at dei har eit langt brot som er lett å trekka oppå utekleda. Eg er ikkje fullt så nøgd med avsluttinga på vottane. Dei er felt i ein spiss. Eg forkorta han noko men ser at eg må rundfella vottane dersom eg skal spøta dei att seinare.

Vottar

Vottar

Vottefakta

  • Klassiske i storleik 8-10 år: 37 g Ask frå Hillesvåg Ullvarefabrikk. Spøta på pinnar nr 4,0 mm.
  • Klassiske i storleik 8-10 år: 29 g Kauni 8/2. Spøta på pinnar nr 4,0 mm.
  • Klassiske i medium dame: 34 gram Kauni 8/2. Spøta på pinnar nr 4,0 mm.
  • Bjalla i storleik 4 år: 53 gram Léttlopi frå Istex. Spøta på pinnar nr 3,5 og 4,5.

Dei klassiske vottane er ei gratisoppskrift. Ravelry og Free Vintage knitting.
Bjalla er henta frå den danske utgåva av boka Islandsk strikk av Oddný S. Jónsdóttir.


  1. eg tek sjølvkritikk for ikkje å ha teke vare på lenka som forklarte dette så fint 

Verur – islandsgenser til Storebror

Ferie! Ingen jobb. Ikkje gjera noko ting. Inga vekkerklokke. Leggja meg når eg vil og ikkje uroa meg for noko som helst.

Islandsk strik av Oddný S. Jónsdóttir

Me pakka bilen for tre veker ferie. Full bil av fintøy og goretex, ull og badetøy, soveposar og liggeunderlag, stormkjøken og lavvo. Og garn! Masse garn. Klare for tre veker på vegen – fjellturar og slektstreff.

Islandsk strik er full av fine oppskrifter til både born og vaksne og Storebror hadde funne seg ein genser her. Verur, av Védís Jónsdóttir, er ein tradisjonell islandsgenser. Mønster nede på bolen og erma og rundfelling med mønster.

Det er heilt fantastisk å kunna spøta når eg er passasjer i bil. Ikkje følgja med, bare slappa av. Rundt og rundt og av og til sjekka mønsteret. Og når det er ingen jobb å tenka på, og eg kan dela ansvaret for borna mine med nokon andre, så er det masse tid til å spøta.

Genseren til Storebror var rask å spøta. Han er spøta i Léttlopi frå Istex på pinnar 4,5. Eg hadde rekna med å nytta lengre tid enn eg gjorde, men heldigvis hadde eg med meir garn 🙂

Verur

Varmt og fint i Norrland, Sverige. Storebror blir tvinga til å vera modell for den nye genseren sin.

 

 

PS. Det vart ingen fjellturar. Me enda som klimaflyktningar. Fyrst til Norrland i Sverige og deretter Inderøya i Nord-Trøndelag. Bare late feriedagar.

Nyttårsgensar

Før jul i fjor. Året då eg ikkje fekk ferdig nokon ting (nesten). Då sat me oss på toget austover. Med julegåver, koffertar, born, julemat, niste og enno meir pikkpakk. Og spøt. Eg hadde heldigvis fått lyst til å spøta litt, så då var det bare å finna fram garn og oppskrift kvelden før me skulle reisa. Pinnar kjøpte eg på vegen neste dag, hadde ikkje tid til å finna fram det kvelden før.

Spøt på toget var eit genialt sjakktrekk. Toget kom ut av ein tunnel etter Arna og køyrde rett inn i eit ras! Og med eit gjerde liggjande over køyreledningen så måtte straumen kuttast. Så sat me der då, i mørket med bare svakt batterilys. Dei to siste vognene var framleis inne i tunnelen… Fram med garn og pinnar og legg opp til gensar til Maiblomen.

Eg likar Rullegensaren til Nøstebarn. Ingen brot i ribbespøt, bare rundt og rundt og rundt og med raglanfelling så eg slepp sy i armar. Gensaren er spøta i Ask frå Hillesvåg. Dette garnet er tjukkare enn Nøstebarn sitt 2-tråds så eg måtte justera litt i oppskrifta. Eg la opp til den minste storleiken og spøta til han var lang nok. Dvs til storleik 4 år.

Glad og nøgd så spøte eg meg vidare Austover. Toget kom i gang att etter to og ein halv time med venting og med kom fram til slutt. Vel framme så startar jula. Med avslapping og tedrikking. Mat og vitjingar og fullt hus. Og meir mat. Og spøt. Spøtet vart redninga etter fullt hus og eg trengte å slappa av. Det tok ikkje så lang tid før gensaren vart ferdig. Trådfesting og blokking inkludert.

Rullegenser

 

 

Glad Maiblom som ser film saman med Storebror. Og litt tulling vert det tid til óg. Fine gutane

Rullegenser2

Bilspøt

Turen til Svigers er ein god biltur der me krysse vasskiljet mellom Vest og Aust. På slike lange turar like eg å spøta men ikkje alt er eigna for bilen. For tida er eg med på eit hemmeleg samstrikk (knitalong/KAL) på Ravelry. Eit sjal frå designaren Stephen West men det krev for mykje telling til at eg kan gjera det i bilen.

Så i staden har eg starta på ein genser til Maiblomen. Rullegensaren frå Nøstebarn i Kauni 8/2

Ved avreise. Eg la opp og spøta to omgongar før me reiste slik at eg skulle sleppa det i bilen

20120726-120445.jpg

Akkurat framme hos Svigers etter ein lang tur

20120726-120514.jpg

Kom Mai Du Skjønne Milde

Kom, mai, du skjønne, milde,
gjør skogen atter grønn,
og la ved bekk og kilde
fiolen blomstre skjønn!
Hvor ville jeg dog gjerne
at jeg igjen deg så!
Akk, kjære mai, hvor gjerne
gad jeg i marken gå!

Om vint’ren kan man have
vel mangt et tidsfordriv;
man kan i sneen trave –
å ja, et lystig liv!
Men når seg lerken svinger
mot sky med liflig slag,
på engen om å springe –
det er en annen sak!

Kom derfor, mai, du milde,
gjør skogen atter grønn,
og la ved bekk og kilde
fiolen blomstre skjønn!
Hvor ville jeg dog gjerne
at jeg igjen deg så!
Akk, kjære mai, hvor gjerne
gad jeg i marken gå!

Tekst: D.Jæger
Mel: W.A.Mozart

TULL og TØYS!

Det er korkje skjønt eller mildt ute no altså. Eller sagt med facebookfarsotten siste døgeret:

«Mai er avlyst på grunn av tekniske
problemer. Vi sender derfor en reprise av februar
til feilen er ordnet», melder drittvær.no

 

Maiblomen  har blitt ein ekte strilagut og køyre på traktoren sin når me er ute (John Deere, sjølvsagt). Køyre og køyre – han sit og held seg fast i rattet og eg må dra. Når det regnar og bles og er så surt som det har vore dei siste dagane, så blir fingrane iskalde og raude. Og eg har ikkje hjarta til å sjå på dei kalde små henda hans. Rillestrikka vottar frå Strikk til Nøstebarn er raske å laga. Det er dei same eg laga i full fart til Storebror før han reiste på vinterferie hos farmor og farfar og no har altså Maiblomen fått eit par i forseinka eittårsgåve. Dei er spøta i 2-tråds merino frå Askeladen (Nøstebarn) i fargane rust og mørk grøn. Dei same som var i Otto’en.

Eg må be om orsaking for ynskjet eg uttrykte i april då eg hadde spøta nyfødtaviatrix. Hadde eg visst konsekvensane av det eg då sa, så hadde eg aldri håpa på ein kald vår.

Rosa og kaprifolen står grøn og fin. Og det er så  surt og kaldt ute.

Strilagut på traktoren sin. Han kunne køyrt heile dagen slik som dette. Men eg er ikkje heilt enig altså.

Fortare mamma. FORTARE!